અમરોલી કોસાડ એચ-2 આવાસ ખાતે ગેરકાયદેસર રીતે એમ.ડી. ડ્રગ્સનું વેચાણ કરતા એક દંપતીને ઝડપી પાડવામાં આવ્યું. આ દંપતીના કબ્જામાંથી કુલ 12.359 ગ્રામ એમ.ડી. ડ્રગ્સ, જેની કિંમત 1,23,500 છે, તેમજ વેચાણના રોકડા 1,07,900 અને અન્ય મુદ્દામાલ મળી કુલ 2,41,400નો મુદ્દામાલ કબ્જે કરવામાં આવ્યો છે.
સુરત શહેર ક્રાઈમ બ્રાંચને ગુપ્ત બાતમી મળી હતી કે, અમરોલી કોસાડ આવાસના એચ-2 બિલ્ડીંગ નં. 129, ઘર નં. 4 ખાતે રહેતા મોહસિન અહમદ પટેલ અને તેની પત્ની સમીમ મોહસિન અહમદ પટેલ, બંને સાથે મળીને એમ.ડી. ડ્રગ્સનું છૂટક વેચાણ કરી રહ્યા છે. આ બાતમીના આધારે ક્રાઈમ બ્રાંચના પોલીસ અધિકારીઓ અને કર્મચારીઓએ તાત્કાલિક દરોડો પાડ્યો હતો.
પોલીસના દરોડા દરમિયાન મોહસિન અહમદ પટેલ અને તેની પત્ની સમીમને તેમના ઘરેથી ગેરકાયદેસર માદક પદાર્થ એમ.ડી. ડ્રગ્સ અને વજનકાંટા સાથે પકડી પાડવામાં આવ્યા હતા. આરોપીઓના કબ્જામાંથી કુલ 12.250 ગ્રામ મેફેડ્રોન ડ્રગ્સ મળી આવ્યું હતું, જેની અંદાજિત કિંમત 1,23,500 છે. આ ઉપરાંત, પોલીસે વેચાણના રોકડા 1,07,900, બે મોબાઇલ ફોન જેની કિંમત 10,000 છે, એક કાળા કલરનું નાનું લેડીસ પર્સ, એક લાલ-પીળા કલરનું પાઉચ, બે ડિજિટલ વજનકાંટા અને 53 નાની પ્લાસ્ટિક ઝીપબેગની કોથળીઓ પણ કબ્જે કરી હતી. આમ, કુલ 2,41,400નો મુદ્દામાલ જપ્ત કરવામાં આવ્યો હતો.
પકડાયેલા દંપતીની પૂછપરછમાં જાણવા મળ્યું કે, તેઓ આ એમ.ડી. ડ્રગ્સનો જથ્થો ટૂંકા ગાળામા વેચાણ કરવા માટે લાવ્યા હતા. તેઓ એક ગ્રામ એમ.ડી. ડ્રગ્સમાથી 5 થી 6 નાની પડીકીઓ બનાવતા હતા અને દરેક પડીકી 600મા છૂટકમા વેચતા હતા. આ વેચાણથી તેઓ મોટા પ્રમાણમા નફો કમાતા હતા.
